財政司司長曾俊華（鬍鬚曾）前年於政府內部提出「011」慳錢計劃，即各部門喺今個財政年度可以維持開支現狀，但未來兩個年度就要每年慳百分之一開支。本報早前報道，多個前線部門都抱怨「巧婦難為無米炊」，唔知係咪計劃惹來太多不滿意見，據聞政府內部早前已發出通告，「微調」計劃令部門唔使慳錢，但要做新服務，變相要部門增值。換言之，慳錢計劃已經名存實亡。
「011」慳錢計劃係因應去年長遠財政工作計劃小組報告而出台，鬍鬚曾指示庫務科，研究點樣減慢開支增長幅度，最終決定要求各部門由下個財政年度起，每年節省百分之一開支，但每部門開支以數十億至數百億元計算，減幅就高達數千萬元至數億元。最近有報道指，醫管局下個財政年度要削減二點五億元。但細心翻查資料，就會發現醫管局只需削減百分之零點五開支。
消息人士承認，部分部門因服務性質，故此毋須削減百分之一開支，部分更只係削減百分之零點二五，即原本嘅一半或四分之一。原來政府內部已出咗通告，容許部門保留削減嘅開支，但要求部門提出新服務，變相增值。本報之前報道過，涉及部門如康文署、社會福利署嘅直屬局長，都趁高官「早禱會」直接訴苦，指部門反映慳錢有困難，希望鬍鬚曾再三考慮，似乎真係奏效。