政情：三路激進泛民攬炒
本報早前率先報道，學民思潮有意與部分「傘兵」合組政黨，安排前發言人黎汶洛與學聯秘書長羅冠聰出戰九月立法會選舉，而未夠秤嘅召集人黃之鋒同周庭，則會等待司法覆核選舉年齡結果，再決定去向。除咗學民思潮外，本土民主前線（本民前）及傘後團體青年新政亦靜靜起革命，積極拉攏相近理念嘅組織合作出戰立法會選舉，預料三股激進傘後新勢力好大機會無法協調出選，互相廝殺搶票「攬炒」在所難免。
配票失敗老是常出現
佔領行動之後衍生嘅激進勢力崛起，區議會選舉結果更加印證激進泛民主派與本土派不乏支持者。據悉，激進組織、傘後團體等一共有三夥人正互相搶人，包括本民前及熱血公民，有意夥拍城邦論倡議者、嶺大教授陳雲，合共派出最少四張名單出選。學民思潮則與西環飛躍動力及社區公民約章派出兩張至四張名單出選。至於青年新政亦派出最少兩張參選名單。另外，仲有東九龍社區關注組、慈雲山建設力量等組織，仍未決定去向。
立法會只有五個直選選區，喺僧多粥少情況下，撞區情況必定出現。例如學民思潮黎汶洛有意出戰嘅九龍東選區，據知有份發起初一支持小販、佔領行動時創辦小麗民主教室嘅劉小麗亦有意出選，兩人不論票源、論述與主張都有啲相似，名副其實係「撞到七彩」。黎汶洛接受查詢時指，佢會喺四月前與不同團體聯絡，包括泛民及本土組織，但佢唔評論個別情況，只寄語各組織要「為大局」着想，爭取泛民取得過半數立法會議席。
其實泛民協調及配票策略失敗，因而令候選人落選嘅情況比比皆是，好似上次立法會選舉中，社民連陶君行與熱血公民黃洋達都出戰九龍東選區，喺互相搶票下雙雙落選，就係最好嘅例子。
學民唔聽意見料攪亂檔
雖然學民思潮聲稱有意協調，但亦有人質疑，學民思潮班年輕人唔聽意見，同其他組織未必夾得來。究竟佢哋最終能否協調成功，就留待四月自有分曉。