中環出更：聞磚「星」變 倡鋪水泥路
旺角暴亂當晚，暴徒撬起環保地磚攻擊警察，自此之後，唔少人對地磚都有新嘅睇法。立法會民政事務委員會尋日開會，本來只係討論大埔興建新嘅體育館、社區會堂及足球場，但金融界議員吳亮星（星爺）就對地磚「情有獨鍾」。佢話地磚近日變得好敏感，容易畀人撬出來，如果社區會堂等地點有集會，就要更加小心。
星爺話，如遇天雨，行人路地磚有機會鬆起，產生凹凸位，容易令人跌親，特別係年紀較大嘅人，建議改以水泥或柏油路，會更加安全。
建築署工程策劃總監余伍嘉珍身為技術官員，回應當然唔會觸及政治問題，指鋪地磚有多種選擇，會考慮安全性，就咁帶過。不過，凡係磚頭用作攻擊武器都有殺傷力，莫非建築署用塑膠做地磚？
卓妮