《明天會更好》呢首歌曾經唱到街知巷聞，好多人真係以為香港明天會更好。可惜吖，唱歌還唱歌，現實歸現實，香港回歸後紛紛擾擾，幾乎永無寧日，明天唔係更好，而係更差。尤其係近年激進勢力抬頭，成日無事生非，更加令香港不斷沉淪。呢，啱啱踏入猴年就發生幾十年來最嚴重嘅暴亂，暴徒幾乎反轉成個旺角，睇見咁嘅場面，唔驚就假。
「東方報業民意調查」顯示，多數受訪市民認為激進組織愈來愈暴力，皆因港府有法不依，法治不彰，咁搞法，唔止損害香港國際形象，而且衝擊法治，重創核心價值。
冇錯嘞，今次暴亂唔係偶然，而係有組織有預謀，本土派幾乎空群而出，盾牌、頭盔、面罩、棍棒，要乜有乜，可見佢哋居心叵測，利用新春假期搞事，無非想置香港於死地。最無辜係前線警員，由於高層指揮混亂、部署失當、裝備不足，警員成為暴徒嘅人肉沙包，導致傷兵纍纍，冇搞出人命已經係不幸中之大幸。正如上述調查顯示，多數受訪者認為暴徒已經失去理性，警方掉以輕心，警力及裝備都不足，卒之搞出個大頭佛。
正所謂，冰凍三尺，非一日之寒。旺角暴亂既係深層次矛盾嘅爆發，亦係佔中違法意識嘅蔓延，香港被一步步推入暴力深淵，反對派不斷煽風點火固然係罪魁禍首，而司法機構姑息養奸同樣難辭其咎。佔中之亂已經結束一年有多，主要搞手及幕後黑手仍然逍遙法外，即使有人被落案檢控，亦經常獲得司法輕放，除咗傳達「犯法無罪，造反有理」嘅錯誤訊息，更係變相鼓勵激進組織繼續搞事。受訪市民直斥政府太過軟弱，執法不嚴，令搞事者有恃無恐，一啲都冇講錯。
車公靈籤預示，香港本來係福地，可惜港人身在福中不知福，搞到福地淪為亂地，可謂一語中的。激進組織愈來愈暴力，愈來愈無法無天，正如癌細胞不斷擴散一樣，香港唔止淪為亂地，遲早嗚呼哀哉都似。
所以話，自作孽，不可活，香港繼續咁樣搞落去，對任何人都冇好處，損害國際形象、衝擊經濟事小，分分鐘出現類似伊斯蘭國嘅恐怖組織事大。試諗吓，萬一香港變成戰火紛飛嘅敍利亞同阿富汗，邊個會得益呢？咪以為係危言聳聽吖，旺角暴亂之後，連日來有人到處縱火，香港火頭處處，危機四伏，隨時爆大鑊吖。中國外交部發言人將旺角暴亂定性為「由個別本土激進分離組織為主策動的暴亂事件」，等同疆獨、藏獨等分離組織，同恐怖組織只係一線之差，唔係冇理由o架！