政情：鄉紳識「簡」 推廣新界文化
新界傳統文化愈來愈式微，為咗令年輕一代可以多啲了解新界傳統文化，一班鄉紳委託廣東社團總會會長兼秘書長簡松年個仔簡汝謙（Ronald）幫手開個Facebook專頁，實行令年輕人多啲了解新界人。
盼以社交網吸引年輕人
Ronald話，依家嘅年輕人對新界傳統文化一知半解，希望利用社交網站介紹，以吸引年輕人注意。Ronald唔單止後生，仲係青年事務委員會委員，理論上應該好熟悉年輕人動態。不過成個推廣計劃十劃都未有一撇，依家喺社交網站上只搵到一個提供新界地區新聞嘅專頁，個專頁只得廿幾人讚好。唔知Ronald有冇把握搞旺個場，唔好重蹈覆轍呢？