政情：長毛交棒不提裸退

社民連創黨時係香港政壇最旗幟鮮明嘅左翼，○八年仲係黨員嘅黃毓民就向前特首曾蔭權爵士掟出第一隻蕉，成為喺議會廳掟嘢嘅始祖。社民連之後一直都以公民抗命為主，創下多個「首次」，包括一○年發起「五區公投」、一一年反對預算案遊行後留守街頭被捕，亦因此提高咗市民抗爭意識。

聲勢下滑 曾被圍辱罵

不過近年更激進嘅政團冒起，社民連明顯已被取而代之。長毛去年喺旺角就畀反對「網絡廿三條」嘅激進人士包圍辱罵，真係時不我與。

社民連前主席陶君行一一年因為區議會選舉失利辭職，長毛於翌年會員大會接替擔任主席至今。長毛話，當年因為區選失利先做主席，自己已做咗四年，冇理由成日霸住個位，所以決定退下火線，但會留任行政委員。

吳文遠接任主席機會高

咁交棒畀邊個呢？據悉現任外務副主席吳文遠呼聲最高，外副就由內務副主席黃浩銘（阿銘）頂上，秘書長陳德章則升任內副。

依家潮流興世代交替，咁長毛會唔會連立法會議員個位都退埋？長毛就話「要傾吓先」，因為唔係一個人嘅事，如果有黨員想選，佢唔會阻攔。我哋問過吳文遠係咪會接任主席，佢就話「唔答呢啲嘢」。

據知情人士分析，長毛退位嘅原因仲包括佢一直都唔想理黨務，而且退下火線後，新人先至有機會上位。據悉，長毛暫時仲好大機會喺新界東出選尋求連任，而阿銘就同傘兵以及學運中人協調緊，有機會出選新界西。社民連最終係多取一席，定係全軍覆沒，大家放長雙眼睇喇！