中環出更：沈豪傑新春團拜當親子遊
元朗區議會主席沈豪傑（Wilson）上任只係短短個幾月，但對比過去區議員生涯絕對「沒有最忙，只有更忙」，經常要代表區議會出席大大小小嘅會議及活動，同兩歲囝囝聚少離多，每個月接送囝囝返一次playgroup已經係佢嘅「目標」。不過，Wilson最近自行發掘兩仔爺嘅親子時間，就係趁新春期間帶埋囝囝出席新春團拜，咁就有多啲時間陪囝囝喇！
訓練囝囝唔怕陌生人
Wilson去年「升呢」接掌元朗區議會後，已經預咗未來四年會好忙，所以將囝囝同律師事務所交晒畀都係律師嘅太太Careen接手。Wilson笑言太太主力幫佢「看門口」，難為Careen冇詐型，尋日情人節都孖住Wilson出席活動。
至於Wilson「發明」咗帶埋囝囝出席公務活動當親子時間，佢話唯一好處係希望囝囝見慣熱鬧場面，就唔會怕同陌生人溝通，但就唔係為咗備戰名校幼稚園面試，佢同太太亦冇諗住做怪獸家長，笑言讀番元朗區內園都冇問題，最緊要囝囝開心咁話。
卓妮