中環出更:蔣麗芸耍住花槍度佳節

尋日係情人節,好多人都同摯愛嘅人溫馨度過。不過曾經自爆丈夫梁海明經常忘記結婚紀念日嘅立法會議員蔣麗芸(Ann),尋日同梁海明一齊喺屋企舉行傳媒新春團拜時,梁海明又忘記尋日係情人節,冇準備禮物,惟有錫番啖補鑊,認真冇記性。

眾人起哄叫梁海明錫多啖,但係Ann唔制,仲話要一個人去添馬公園睇「花海」,唔預老公喎,今次真係大鑊喇!其實兩人只係耍吓花槍啫,轉頭Ann就幫丈夫兜番,話自己都唔記得尋日係情人節喎!

Ann又教路大家點搵伴侶,佢話,最好係搵大自己十幾廿年,咁先可以教自己點行條路,而且有經濟基礎。講講吓,佢仲以立法會議員謝偉俊為例,打趣叫現場男士可以考慮吓麥美娟、劉慧卿同陳婉嫻添!

郭詩慧一家大細慶祝

另一邊廂,卓妮喺沙田馬場見到「快勞夾大王」國際文具集團主席兼行政總裁杜振源(Simon),佢笑言自從阿仔出咗世之後,就一直甚少有機會與太太過二人世界嘅情人節,通常都係一家人一齊慶祝。後來阿仔結咗婚,呢兩年仲多咗個孫一齊過添,好熱鬧。新年期間,香港天寒地凍,Simon就同家人去墨爾本玩,過咗個暖笠笠嘅假期。

莎莎國際主席郭少明嘅女兒郭詩慧(Melody)與老公陳振邦都有入場。Melody話,佢哋同小朋友啱啱去完日本旅行,小朋友滑雪好開心。至於情人節,就會同小朋友一齊食晚飯慶祝。

卓妮

第一手消息請下載on.cc東網iPhone/iPad/Android/Windows Phone Apps