根據玄學理論，過去三年係「火焚年」，踏入猴年後火勢照計應該稍為減弱，可惜事實啱啱相反，大年初一就爆發旺角暴亂，跟住接二連三發生縱火案，搞到火頭處處，證明猴年火氣一樣咁旺，香港都幾難平靜咯。
呢幾單縱火案夠晒離奇。年初二凌晨旺角暴亂最高峰嘅時候，康文署位於美孚新邨巴士總站天橋底嘅貨倉被人潛入放火，烈燄熊熊，裏面嘅木椅及垃圾桶等雜物付諸一炬；年初四晚，油麻地一個路邊垃圾桶突然爆炸起火，警方需要出動爆炸品處理人員到場調查；然後輪到花墟公園成為施襲目標，逾四十個垃圾桶被焚毀，康文署辦公樓外牆嚴重熏黑，公廁天花板及抽氣扇亦被焚毀；最得人驚嘅係，葵涌貨櫃碼頭嘅露天停車場發生三級大火，三十幾架車焚毀，警方列為縱火案處理。大家話嘞，呢個猴年係咪火氣沖天吖？
呢幾單縱火案究竟有何動機，同旺角暴亂有冇關係，仍有待警方進一步調查，唯一可以肯定嘅係，再咁樣搞落去，香港遲早一鑊熟。今日就話燒垃圾桶燒貨櫃啫，點知聽日會唔會燒建築物(口架)？唔係嚇你，除咗油麻地垃圾桶爆炸案發現多個氣體罐，花墟公園縱火現場亦發現兩處火頭及疑屬天拿水嘅易燃液體，懷疑有人蓄意挑釁警方。家陣立立亂，街頭衝突無日無之，加上縱火案接二連三，香港想唔死都幾難。
所以話，旺角暴亂就似打開潘朵拉盒子，亂象陸續有來。呢，旺角「鳩嗚團」又出動嘞，日前有幾十人喺西洋菜街一帶聚集，有人手持黃傘及高舉橫額，期間同途人發生爭執，爆發衝突，最後要驚動警方到場平息。最離譜嘅係，有人喺網上狂言捐錢畀狂徒報復警察，灣仔警察總部同入境事務大樓仲接連收到炸彈恐嚇添。正如學者話齋，呢啲只係暴力嘅開端，喺漣漪效應之下，更大嘅亂象仍在後頭，星星之火燒燒吓，隨時燒毀整個森林(口架)。
受外圍環境不景氣影響，香港經濟本來已經陰霾密布，隱憂重重，加上政治氣氛不斷惡化，成個社會七國咁亂，想有運行都幾難。最大鑊嘅係，連一直被視為核心價值嘅法治精神都蕩然無存，「不守法絕對不等同不尊重法治」嘅歪理被部分年輕人視為金科玉律，加上港府有法不依，姑息養奸，結果咪搞到愈來愈暴力，愈來愈無法無天囉。一個唔講法治嘅社會，等於倒退到叢林社會，咁嘅香港仲有乜前途呢？
風水玄學，有時幾靈(口架)，玄學家話今年係「火猴年」，變幻莫測，難以捉摸，果然冇講錯。香港紛紛擾擾，自甘墮落，未來一年睇怕都係水深火熱(口架)嘞，大家最緊要自求多福吖。