政情：今日你上鏡：出花紅 撈過界 運籌帷幄

打工仔一年到晚辛勤工作，年尾出花紅可以話係最大嘅推動力，但原來內地一般無派花紅呢個習慣。理文造紙榮譽主席李運強話，內地工人過去幾年嘅人工加幅同速度都比較急，所以今年暫時唔加住，但就會首次派發半個月花紅，由於內地廠房一般唔會派花紅，所以工人知道有花紅分都好開心，今年可以過肥年。李運強又話，近年生產及製造業都有放緩迹象，佢哋都要跟隨呢個趨勢改變策略，除咗開始賣紙巾等消費品，仲喺江蘇同三亞經營酒店，實行進軍旅遊服務行業。