政情：為做女神 瘦麗示人
剛剛過去嘅區議會選舉，唔少年輕嘅新面孔成功進入議會，好似沙田區議會富龍區議員曾素麗（Yen）唔單止擊敗建制派老將，更加因為外貌討好，成為唔少網民嘅女神。阿Yen早前就透露，佢喺選舉期間肥咗近廿磅，所以新年過後要積極減肥，力保女神外號。
阿Yen話，一般人參選通常會愈來愈瘦，事關早出晚歸，又無啖好食，但佢情況啱啱相反，一來有街坊帶好多小食、糕點支持佢，二來佢每次覺得做嘢辛苦，都會出於「補償心理」食好多嘢，久而久之就愈食愈多、愈食愈肥喇。
跑步跑到扭親
阿Yen話，近日好多區議會工作已經上軌道，短期目標係希望可以透過跑步做運動瘦番少少，好可惜一開始就已經「出師不利」，跑咗唔夠兩星期就扭傷膝蓋，計劃被迫中斷，效果當然亦唔多理想啦。
不過，減肥係女人嘅終身事業，阿Yen仲有漫漫長路，遲下先算喇！