政情：「芬」享心得 為女司機平反
唔少女性司機嘅駕駛技術都被狠評到體無完膚，更成日被取笑撈亂油門同腳掣，而且左右不分，甚至開得慢阻礙其他駕駛者等。不過，同樣為女司機嘅立法會議員梁美芬，為一眾香港女性辯護，認為駕駛技術同方向感有關，同性別無關，仲話認識唔少女車神，手車比男司機仲優秀添。
北京讀書練膽考車
不過，梁美芬都認同，馬路上開得慢及較差嘅多數係女性，所以都明白點解社會上有人會認為女性就等於唔識開車嘅觀念。咁佢手車又點呢？梁美芬就話自己手車只係一般，轉線時都未必次次可以一轉就掂，但起碼安全至上喎。
梁美芬透露，細過時曾目睹車禍，所以一直都唔敢坐車頭位置，直到去咗北京讀書，先能夠克服呢個恐懼。因為佢喺北京讀書時，出入一定要靠踩單車，所以被迫要喺大馬路上同汽車爭路，逐漸連心理恐懼都無埋，終於夠膽考車牌喇！