中環出更：大懵情人節 鄧家彪補鑊
立法會議員工作繁重，分分鐘會忙到唔記得重要日子而忽略家人。勞工界議員鄧家彪（Bill）率先出事仲大呼「死火」，因為佢唔記得咗今日情人節，搞到要趁空檔急約太太補鑊！
Bill本身今日已經將工作安排得密密麻麻，一醒起係情人節就話要諗吓點調動工作，但為求效率，就要趁尋日有空檔，把握時間即刻約太太食個下午茶補鑊，喺冇乜準備下提早慶祝。Bill話太太都知佢忙，應該無預會有任何慶祝活動，難怪佢太太近日悶悶不樂喎。不過，Bill就話太太易氹，而且明白議員工作忙碌，所以相信會體諒佢大頭蝦嘅。
唱歌氹「小情人」被嫌棄
除咗太太之外，Bill仲有位「小情人」要照顧，就係佢囡囡喇！佢希望可以同囡囡合唱一曲當表演，點知擅長唱大戲嘅囡囡竟然嫌棄佢唱得差，枉Bill仲專登揀首難度低啲嘅歌添。睇嚟Bill除咗要落足嘴頭氹囡囡，仲要苦練唱功先得喇！
卓妮