中環出更：時裝騷 盆菜宴 「智」潮新春
尋日農曆大年初六，一眾城中名人現身元朗屏山鄧氏宗祠，事關又係著名時裝設計師鄧達智（William）舉辦年度盆菜宴的日子，今年係咁多年之中最盛大，筵開九十九席全場爆滿，要額外加開至一百零三席外，William一班朋友更為佢大搞驚喜，夾埋佢至愛嘅模特兒首次於盆菜宴期間演出一場時裝騷，夠晒新穎，歡呼聲四起，氣氛極之熱鬧。
出席盆菜宴名人眾多，包括新界鄉議局前主席劉皇發女兒兼設計師劉玉蓮及丈夫余漢坤和子女、香港專業及資深人員會理事楊素珊、香港首位華人女騎師江碧蕙、以及首次參加盆菜宴嘅香港餐務 管理協會主席楊位醒等。
好友籌辦 鼓勵William
事緣William一班好友有感近年市道氣氛麻麻，大家都希望藉此鼓勵William可以繼續發揮才華，於是就精心策劃今次時裝騷，令到William驚喜萬分。William話，雖然市道差咗，但絲毫不減佢對時裝嘅熱誠，而佢嚟緊仲諗住喺祠堂附近開間餐廳賣特色食品添。
講番農曆新年習俗，劉玉蓮話細個嫲嫲會幫手儲起佢哋嘅利是錢，等佢哋夠年齡開戶口就畀番晒佢哋，學習如何理財。兒子係混血兒嘅江碧蕙今次就帶埋兩個仔嚟感受新年氣氛兼教佢哋講賀年祝福，兩個仔睇見舞麒麟等傳統都相當雀躍。
至於楊素珊則難忘童年過節最愛食糖果，親友送禮嘅杏仁糖和枕頭糖都令佢非常回味。
楊位醒細個過新年就常常與媽媽整年糕，話以前啲人鍾意蒸糕多過煎糕，老人家就鍾意將糕點整成圓形多於方形，因為要取團團圓圓嘅意頭喎！
卓妮