公民黨「公文袋」又玩自閉！繼上年杯葛特首就《施政報告》諮詢政黨意見嘅會面後，該黨尋日再次宣布，會杯葛政務司司長林鄭月娥今日搞嘅簡介會同茶敍。呢場茶敍廣邀全港區議員出席，但公文袋喺全港四百五十八個區議員中只佔十個議席，得十個人宣布以杯葛去回應林鄭近期言論同處理全民退休保障嘅態度，有乜實際作用呢？
公文袋認為，林鄭要為佢嘅言論同施政失誤負責，更羅列林鄭近期嘅出位言行，包括處理《二○一四年版權（修訂）條例草案》時，拒絕回應網民訴求同接納泛民主派嘅修訂，又將高鐵撥款直交財務委員會審議，無視程序公義。至於全民退休保障方面，更直斥當局加設入息審查猶如施捨，態度涼薄。
不過，公文袋嘅區議員人丁單薄，連參加俗稱「超級區議會」嘅區議會第二界別議席嘅入場券都攞唔到，仲有傳需要向其他泛民政黨借票「入閘」添。既然該黨有求於其他泛民政黨，點解唔好好合作去組織杯葛，以表現泛民團結一面呢？依家嘅做法反而似扮「泛民大佬」多啲囉。