政情：廢鑊偏幫性小眾 團體轟「呃人 」
平等機會委員會（平機會）上周二公布有關「立法禁止性傾向、性別認同及雙性人身份歧視的研究」報告，報告指出有超過五成受訪者贊成立法，相比十年前的結果增加一倍。不過，性傾向條例家校關注組就批評報告冇水準，而且觀點仲有扭曲成分。召集人黃偉明尋日就召開記者會，批評平機會主席周一嶽（廢鑊）擺到明偏幫性小眾人士，認為報告係擘大眼講大話，「擺明呃人」！
討論會拒多邀反對人士
黃偉明指出，三場討論會當中，得第三場先有反對立法人士獲邀出席，而且十幾個獲邀嘉賓當中，得三人係反對立法。佢話當時有勸喻過主辦機構，希望佢哋邀請多幾位反對立法嘅人士出席，但最後都無接納，批評周一嶽我行我素，擺明有預設立場。
周一嶽喺發報會中指有廣泛證據去證明歧視嘅嚴重性，但黃偉明就反駁，平機會係以網上匿名方式收集個案，根本冇途徑去驗證個案。佢又話，報告同十年前嘅報告調查範圍同問法都唔同，根本就唔可以作出比較，認為周一嶽擺明呃人。