政情：「沈」迷福建炒飯要減半

中文大學喺一三年開始推行「惜食在中大」計劃，希望推動公眾關注廚餘問題。日前中大就搞咗場「剩宴」，校長沈祖堯喺致詞時就自爆，平時喺中大飯堂買飯，最鍾意就係福建炒飯，炒飯分量亦都「加大」咗，為咗唔想浪費食物，次次都食到滯晒，所以今年就決定要求分量減半，上月已成功減咗十磅。

當日沈祖堯仲同環境局局長黃錦星（星星）即場示範煮嘢食，原來兩位都煮得吓。沈祖堯話，讀書時會煮西餐，拿手菜就係焗海鮮雜燴。至於星星就話，佢讀中學時要同家人輪流幫手煮飯，雖然只係煮三餸一湯，但就要煮夠九個人嘅分量，難怪佢話煮嘢食無難度喇。