政情：田少抽火水 禍連黨友
做得建制派就要安分守己，但好似自由黨立法會議員田北俊（田少），一直為自己打造「壞孩子」形象，鍾意抽水鬧政府，網上呃like無成本，似乎好過癮，點知接連抽水抽出禍！他日前又將立法會審議港珠澳大橋追加撥款會議片段到社交網站，寸爆運輸及房屋局副局長邱誠武（邱副）無坦白回答問題，結果就被網民質問他「點解唔投反對票」，瘀爆之餘，更連累黨友被諷「點解（官員）乜都答唔到」都投贊成票？
網民狠批「最唔負責任」
田少在片段中問邱副，港珠澳大橋通車後可否開車去珠海，邱副就答不出，田少就留言：「究竟係邊個求邊個？局長依家教我問問題？不如坦坦白白答好過啦！」田少講就兇狠，但投票立場就被多名網民批評，為何他無投反對票？有人叫他「不要每事都只為政府護航，做一位有良知的建制派」。田少就指自己已經無投票支持政府，但仍有網民不滿說：「你又唔投，抽乜嘢水啫你，慳啲啦！」又有人狠批他：「做議員最唔負責任是不投票。」
翻查投票紀錄，田少兩個黨友張宇人和易志明都投贊成票，有網民亦寸爆：「自由黨最後咪又係投贊成票。」又有人叫佢問下黨友，「點解（官員）乜都答唔到都投贊成票？」其實除了田少無投票外，黨主席鍾國斌及黨魁方剛都無投票，但一度被網民留言誤指投贊成票。
TSA議題已犯同樣錯誤
水能載舟，亦能覆舟，亂抽水適得其反。田少抽水抽着火水都並非首次，他去年十二月就試過貼了一張踩單車相到社交網站，抽水話「好可惜」無機會考小三全港性系統評估（TSA），搞到用了所有時間去玩，例如學踩單車，但隨即被網民揭發他無就取消TSA議案投票，只是「得把口」抽水，最後他要道歉收場。今次田少又重蹈覆轍，看來都要學網上潮圖講句「人類總要重複同樣的錯誤」呀！