中環出更：開門見山「碧」婚無尷尬
農曆新年就到，一眾宅男剩女拜年時最怕被親友「審犯」咁查問拍拖或結婚狀況，為免尷尬同口啞啞，近日有網站就諗到招聘春節女友或男友，拜年前「夾晒口供」一齊見親戚，必要時仲可以拖手擁抱添。卓妮尋日在沙田馬場見到香港首位華人女騎師江碧蕙（Sherie），佢就話當年未遇過呢啲尷尬情況，事關佢同男友拍拖一年就開門見山談婚論嫁，半年後就已經拉埋天窗，避過呢段尷尬時期。
講到點解會出現招聘臨時男友女友呢個現象時，Sherie就話現時好多人都遲婚，可能係因為覺得唔結婚都冇所謂，加上生活於數碼時代，唔少人放假足不出戶於家中上網又一日，不知不覺變成宅男或乾物女，到新年時親友問起又唔知點交代，於是就出現呢類需求喇。
郭少明唔願咁快嫁女
至於莎莎國際主席郭少明女兒郭詩慧（Melody）就話，婚前冇試過被親戚或者家人催婚或搵番個伴，皆因當年家人一早就送咗佢去外國讀書，而佢返來後，家人都非常珍惜彼此相處嘅時間，爸爸更加唔想咁快嫁個女出去，想佢留喺身邊陪吓自己，所以佢喺呢方面可謂完全冇壓力。卓妮同場仲見到生產力促進局主席劉展灝夫婦及保良局前主席鄭錦鐘夫婦。劉展灝話，依家時代唔同咗，好多年輕人都話要有樓先結婚，作為父母嘅都急唔嚟，而佢同太太平日亦甚少干涉後輩嘅感情狀況，覺得有啲親戚好耐冇見面，問起都係關心吓佢哋或想打開話匣子。鄭錦鐘太太亦留意到該招聘廣告，覺得好有創意，認為年輕人搵另一半最緊要適合喎。
卓妮