政情：Greg蘇爭住駁嘴被勒令收聲
立法會議員經常胡亂提出規程問題，但原來官員都不熟悉議事規則，經濟及商務局局長蘇錦樑（Greg蘇）尋日出席立法會續會時，就被主席曾鈺成要求收聲，認真失威！話說議員郭榮鏗批評Greg蘇連基本合約原則都唔清楚，未夠班討論版權條例，搞到Greg蘇忍唔住反駁。不過，曾鈺成就立即提醒，話Greg蘇所提嘅並非規程問題，有意見應留待發言時間發表，部分泛民議員更借機起哄，睇嚟Greg蘇真係要惡補吓喇！
笑完大舊現眼報
其實在Greg蘇駁咀之前，曾得戚陰陰嘴笑人民力量陳偉業（大舊）被主席曾鈺成話，點知轉頭現眼報。當時大舊批評建制派反對休會，但前日宣布休會時就第一時間撲出門口係自相矛盾。曾鈺成就反指，當時係宣布「會議暫停」而非「休會」，但大舊依然死撐，稱英文上兩者有共通點，迫到英文了得嘅曾鈺成出手，指「會議暫停」 係「suspended」，而休會係「adjourn」，本質上有不同。大舊聽完後只好以「多謝主席指點」作完場喇！
此外，議員盧偉國都出醜，他指斥泛民議員亂稱建制派「軀殼在靈魂不在」，質疑泛民集體離場係「軀殼不在靈魂在」，建議以後點算人數時計算埋不在席泛民議員嘅靈魂。曾鈺成就話，離開軀殼嘅係鬼魂，而立法會點算人數是只計活人，不計鬼魂，秒殺盧偉國！