同樂日除咗玩遊戲外，亦有自助晚宴。內務委員會尋日討論就同樂日成立籌備委員會，由內會主席擔任委員會主席，成員包括議員及記者，開支由議員分擔，按上屆經驗，每名議員要科水一千元。雖然會上冇人反對成立委員會，籌備同樂日細節，但民主黨單仲偕就話唔多想搞。
單仲偕話，以往同樂日在會期初舉行，等記者同議員熟落，但近年愈做愈低調同冇料，變成告別派對，加上佢認為泛民建制關係劍拔弩張，搞咗隨時有反效果，意義不大。不過，工聯會黃國健就話，雖然泛民建制政見唔啱，但都唔係老死不相往來，唔使任何時候都冇偈傾喎。佢認為，透過遊戲可令雙方增強溝通合作，有助改善關係。