中環出更：甩轆兩個月 楊偉雄終有副手
創新及科技局局長楊偉雄去年十一月上任後，外界就開始關注副局長人選。楊偉雄上任冇耐曾經講過，副局長同政治助理都係由佢揀，仲話一、兩星期會完成有關程序，點知拖到今個月中，佢先至承認甩轆，低估有關程序所需嘅時間。政府尋日終於公布創科局副局長及政助人選，分別係數碼港管理有限公司技術總監鍾偉強及在團結香港基金負責資訊科技基礎設施發展等工作的梁淑寶。
鍾偉強及梁淑寶會分別喺三月一日及下月十一日上任。楊偉雄大讚兩人都非常有實力，而且喺現今挑戰性咁高嘅環境都肯放棄原有工作加入政府。唔通楊偉雄上任兩個月，終於明白香港政治環境風高浪急？
楊德強正式就任體育專員
在資訊科技管理及創業發展工作有廿八年經驗嘅鍾偉強，與楊偉雄在數碼港共事六年，應該好有默契，再度合作係咪可以搞好香港創新科技，真係要拭目以待。另外，政府尋日亦公布委任民政事務局副秘書長楊德強為體育專員，下月一日生效。
卓妮