中環出更：遊舊地「陳」述「美荷」當年情
位於石硤尾的美荷樓係首批「活化歷史建築伙伴計劃」嘅歷史建築，由香港青年旅舍協會（YHA）活化成為青年旅舍，近日獲頒聯合國教科文組織嘅「亞太區文化遺產保護獎」，尋日舉行頒授儀式。除咗聯合國教科文組織東亞區文化事務組主管Himalchuli Gurung主持儀式，發展局局長陳茂波（波叔）、深水埗區議會主席張永森、YHA主席廖仲賢都有出席，波叔仲分享童年在美荷樓寄人籬下嘅往事。
波叔當時居於石硤尾木屋區，家境較窮，連新年利是都要全數上繳給媽媽。佢話，有時屋企人忙得滯冇飯食，仲會去隔離鄰舍黐餐。有年農曆新年拜完年之後返屋企，發現成間屋被火燒到無晒，結果成家就去姨媽嘅美荷樓屋企暫住，由於細個唔識愁，翌日仲返火災現場睇吓執唔執到碎銀。
過年嬉戲 歷歷在目
波叔姨媽有成七個仔女，同波叔相處得好好，加上佢有同學居於美荷樓，過年一齊玩得好開心。YHA前主席黃奕鑑細個就住深水埗劏房長大，對該區都有番咁上下感情。
臨近農曆新年，一眾嘉賓都齊齊應節，即席揮毫寫揮春賀年。波叔寫了「健康快樂」，卓妮見佢手字唔錯，連司儀都忍唔住口讚佢寫得靚。不過，波叔就話因為細個罰抄得多，所以練成一手靚字。張永森就寫了「政通人和」，唔通佢因為以一票之差贏咗民協譚國僑當選主席，擔心區議會事務上隨時會諸事不順，所以希望政治路路暢通同人事和諧？
卓妮