前年立法會議員李卓人及梁國雄被爆出接受捐款醜聞，李更被指涉嫌私吞利息。雖然立法會議員個人利益監察委員會調查後，裁定投訴不成立，不過事件餘波未了。最近議員梁繼昌（Kenneth）就申報銀行回贈嘅超市禮劵，價值一千六百五十蚊，唔知係咪怕捲入醜聞而申報呢？
平時議員都會申報各式各樣嘅物品，但就好少見超市禮劵。點解銀行會送禮劵呢？事緣Kenneth喺上年轉用網上付款方式，幫辦事處嘅職員交強積金供款，所以銀行回贈超市禮劵。Kenneth話，打算將禮劵用作員工福利，畀辦事處職員買吓零食喎！
其實議員助理嘅強積金都係由公帑支出，呢次Kenneth收到嘅回贈既然係因強積金而起，所以都同公帑有關連，所以佢都算夠清醒，識得申報，免得來日夜長夢多。