政情：版權例綑綁審議 隨時攬炒
《二○一四版權（修訂）條例草案》成為泛民議員喺立法會拉布嘅主戰場，由去年十二月至今，總共喺大會商討三次，流會咗三次，都只係勉強完成二讀，離三讀通過仲有一大段距離。政務司司長林鄭月娥曾經放話，會同立法會主席曾鈺成商討，為草案「製造最大空間、預備最長時間」審議。有建制派中人透露，所謂「最大空間」，即係盡量延長大會時間，其中一個方向，可能係將臨時撥款決議案押至最後先審議，但呢個綑綁舉動，隨時有機會引火自焚，兩敗俱傷。
延長大會時間「製造空間」
林鄭早前態度強硬，揚言唔會撤回條例草案，近日更講到明，點樣都要令草案喺本立法年度通過。有分析指，林鄭本來想試吓口風，一旦草案進度仍然緩慢，隨時真係要讓步。不過建制派上星期四突襲二讀成功，就令政府決定死撐落去，唔可以讓步畀泛民。
建制派消息人士話，政府初步傾向考慮延長開會時間，除咗考慮延長每日開會時間之外，亦考慮喺公布財政預算案或內地召開「兩會」期間延長大會。過往每逢二月底發表完預算案後，立法會大會即會結束，三月初唔少議員要上京參加人大政協會議，立法會亦只會星期三開大會。所以政府惟有搵到邊日有空位，就喺嗰日加會。據聞政府暫時仲未考慮通宵開會，可能係擔心就算通宵開會，唔係個個建制派都捱到啩？
引火自焚有前科 兩敗俱傷
除咗加會，政府仲諗到一個絕招，就係將臨時撥款決議案押至最後關頭，將臨時撥款及版權法草案進行綑綁。事關以往激進泛民就預算案拉布可以拉到五月尾，如果一日版權草案未通過或唔撤回，一日政府都攞唔到臨時撥款，即係四月一日新財政年度即刻冇錢用。咁做或令泛民唔敢拉布到底，不過呢步係險棋，因為一一年立法會真係試過否決決議案，到時如果真係趕唔切通過，政府隨時惹火燒身，唔知到時又點收科呢？