中環出更：曾德成蒲頭：無意復出政壇
民政事務局前局長曾德成自去年七月「被免職」之後，一直都冇乜喺公開場合出現過，除咗被卓妮「野生捕獲」佢同老婆去日本旅行之外，就係喺社交網站被發現去行山。不過尋日曉民教育中心開幕時，曾德成就罕有現身做主禮嘉賓。事緣教育中心董事長謝尚偉喺曾德成任內，出任民政事務局香港青年服務團團長。
卓妮趁機問佢會唔會重出江湖，曾德成就反問咩叫重出江湖。咁例如九月時會唔會轉戰立法會選舉？曾德成笑笑口話未有打算，仲話離開咗政壇後，都係去吓旅行、休息吓，仲會讀吓書。
「不在其位」拒評施政報告
講起立法會泛民議員不停拉布，將各項法案審議進度有咁慢拖咁慢，搞到曾德成哥哥，即立法會主席曾鈺成都好頭痕，早幾日仲病到返唔到立法會主持大會添。曾德成就話，曾鈺成已經好番喇，仲話絕對相信佢可以處理好議會嘅拉布問題。問到對新一份施政報告有咩評價，曾德成就形容自己「不在其位、不謀其政」，所以唔方便評論。
卓妮