中環出更：「譚」論賽駒：隆鼻增勝算
尋日沙田馬場舉行博愛盃賽事，博愛醫院主席譚姜美珠（Winnie）、副主席彭少衍及李柏成等董事局一班高層齊出動，而善德基金會主席董吳玲玲亦去撐場，佢丈夫董中浩名下愛駒「翡翠紅星」尋日亦有出賽，結果輸咗個馬鼻跑第二。Winnie開玩笑教董太帶愛駒去韓國打美容針，整高個鼻咪得囉，氹到董太哈哈笑。
身為慈善團體主席通常都忙到飛起，Winnie亦唔例外，仲搞到第一次入博愛醫院添！事關早前佢同博愛同事到廣西訪問，唔小心扭親隻腳，事後服食止痛藥導致敏感，結果要入醫院大檢查，前日先至好番晒，可及時出席尋日嘅活動。Winnie笑稱，今次係佢首次使用博愛醫院嘅服務，結果梗係好滿意喇！
吳俊華唱好非洲國家
尋日入場嘅仲有香港鐘表業總會前主席梁青華、博愛前副主席吳俊華（James）、林賢奇及總理林群等人。梁青華同博愛總理梁天富相識多年，所以捐出一隻價值廿幾萬靚錶做獎品，仲親自入場支持，相當有心。
至於喺非洲投資農業嘅James，最近牽頭成立「香港非洲商會」，並出任創會主席。James話，非洲係「一帶一路」嘅其中一站，希望成立商會配合歷史機遇，協助商界打開非洲之門。James仲趁機為非洲國家抱不平，認為香港人以為當地好窮，治安又唔好，其實非洲有幾十個國家，當地經濟發展亦唔錯，希望將來商會做多啲正面宣傳，令港人對非洲印象改觀。
卓妮