「但得柔情消俠氣，此生長願伴妝台」；「好打得」嘅政務司司長林鄭月娥，最近接受報章專訪，斬釘截鐵明確表態「不會留任，做番自己」；可見在官場，往往被迫戴上面具，要講一套做一套，「好打得」也許唔係真係咁打得，「真我」其實係「恰似你的溫柔」；一個人能「做番自己」，其實係一種福氣。
「做番自己」，看似不經意的一句話，其實是一種「重生」的欣悅；有道是「精神到處文章老，學問深時意氣平」；從高官的「好打得」，去到真性情「做番自己」，「意氣平」時，天地自然廣闊。「天上浮雲如白衣，斯須變幻為蒼狗」，浮雲的多變多姿，「為兩餐乜都肯制」嘅上班一族，每日低頭亂忙，幾許會注意到啊，只有「做番自己」，才可細味生活嘅美好一面。
林鄭月娥忽然意興闌珊，要離開官場熱廚房，自然引來多方猜測：是否與ＣＹ唔多咬弦？是否以退為進？是否在議事堂常受到一些激進派嘅語言冒犯：「相由心生，你睇你個樣愈來愈肉酸！」林鄭在專訪時特別提到：「大部分人都說，特別我老公說我愈來愈靚，因為心地善良，所以愈來愈靚。」
「心地善良」與「香港良心」都係自己感覺良好，好難拿捏，殺人如麻嘅大盜都可以好孝順父母，佢哋心地一樣善良；至於心地善良會否「愈來愈靚」，更是無稽，一個女人唔打扮吓，心地幾好都冇可能「愈來愈靚」，一如唔懂得謙卑悔疚而只知「官到無求膽自大」，到審判日天堂係唔會預留個位畀啲褻瀆神明、狂妄驕橫之徒㗎！林鄭表面「好打得」，實則「好溫柔」，同大多數女人一樣：亦貪靚，之不過，佢講嘢唔多合邏輯，佢話「唔會留任」，反正「我信了」；而「做番自己」可能又「身不由己」，戲本嘅結局，咁易畀你估到咩！