泛民議員近年喺立法會瘋狂拉布，令大量重要法案、基建工程同民生撥款受拖延。「人到無求膽自大」嘅政務司司長林鄭月娥，尋日就公開向泛民發炮，狠批佢哋月薪超過九萬元，做滿四年任期仲有成六十萬元約滿酬金，卻冇盡好議員責任開會，叫市民認清楚佢哋選出嚟嘅議員表現。以月薪九萬元同一成半嘅約滿酬金計算，議員四年任期可以淨袋近五百萬元，再乘以廿七個泛民議員就一億三千幾萬，用工聯會議員王國興嘅計法，足夠買幾百萬罐午餐肉同豆豉鯪魚囉！
