政情：民協終年輕化 女將揸旗
【本報訊】今屆區議會選舉有多名老將意外落選，多位年輕人爆冷勝出，顯示選民渴求香港政壇加速年輕化。老牌泛民政黨民協近年多次更換領導層，都係換湯不換藥，正副主席由馮檢基、譚國僑同廖成利三位「老將」輪流換位。到尋日該黨再次改選領導層，終於有年輕化嘅迹象，由四十頭嘅前九龍城區議員莫嘉嫻，喺無對手下當選主席，兩名副主席就一老一嫩，分別為譚國僑及施德來。
區會敗選 莫嘉嫻反升呢
莫嘉嫻早於九六年加入民協，由師傅廖成利帶領出戰馬頭圍選區，一擊即中，並且連贏四屆，惟去年爭取再度連任，卻以四十五票之差高票落敗，今次當選主席算係攞番個安慰獎，顯示佢有心繼續喺政壇打滾。
莫嘉嫻今次當選，亦標誌民協成為繼民建聯、新民黨、民主黨、公民黨、工黨及人民力量之後，第七個由女士擔任主席嘅主要政黨，令香港政壇突然顯得陰盛陽衰。