創新及科技局局長楊偉雄早前出席閉門創科論壇時，好威威咁話自己「真係、真係見過Steve Jobs（蘋果公司已故始創人喬布斯）」，畀網民恥笑咗成個禮拜。身兼香港科技園主席嘅行政會議成員羅范椒芬，尋日接受傳媒訪問時就雪中送炭，大讚楊偉雄係創科局長嘅「不二人選」，甚至預告佢可以做多幾年。
羅范指出，楊偉雄本身科研基礎好好，工業又做過、大學又做過、投資者都做過，喺香港同內地嘅網絡亦好強，反問批評者：「你再搵一個人畀我？」講到楊偉雄好似天上有地下無咁。
喺三年半前推動政府架構重組失敗嘅羅范又話，對創科局拖拉多年先成立到感可惜。問及楊偉雄只得番約一年半任期，羅范就不以為然咁話︰「點解認為佢只做年半？」強調不論下屆特首係邊個，只要係好嘅政策，社會都會繼續支持喎。