政情：肥亨破例 港鐵車站宴客
新任港鐵主席嘅馬時亨（肥亨）與多名港鐵高層，尋晚破天荒喺尚未通車嘅港鐵海洋公園站內宴請傳媒BBQ（燒烤）。肥亨形容今次喺港鐵車站內宴客，肯定係「史無前例」，亦唔會再有第二次。
肥亨當年做政策局長時，亦不時舉辦燒烤晚會宴請傳媒，當中最出名係燒羊架，今次當然亦唔少得。酒水方面，佢就帶咗一支喺二○一四年民主黨黨慶晚宴上投得嘅紅酒，強調如果大家覺得支酒有問題，甚至發現係假酒時，請自行向民主黨算帳。
事緣肥亨喺二○一三年嘅民主黨黨慶晚宴，以三十萬元投得一幅由該黨前主席何俊仁捐出、聲稱係「國畫大師」黃永玉手筆嘅名畫，但其後被指係假貨。該黨最終要向黃永玉道歉及向肥亨退款。