政情：「婚」享扣稅 議員唔吼
政府將於下月公布新一份財政預算案，特許會計師公會早前就預算案提出多項建議，其中較為注目嘅係新婚免稅額，即係新婚夫婦喺結婚首年可獲雙倍已婚免稅額，目的係紓緩一下年輕一代嘅壓力。立法會內都有部分議員係單身人士或者新婚冇耐，唔知佢哋覺得呢個新婚免稅額有冇實際作用，會唔會令單身一族對結婚有多啲憧憬呢？
「唔會係結婚誘因」
立法會「王老五」之一嘅議員陳克勤（克勤）話，新婚免稅額呢個建議幾新穎，但就唔會係佢結婚嘅誘因，相信年輕人亦未必會因為免稅額而想結婚。佢自己就覺得，如果結咗婚就上到公屋，反而會吸引到更多年輕人結婚。其實香港嘅租金、樓價唔係個個都負擔得起，公屋嘅輪候時間亦愈來愈長，克勤呢個建議似乎吸引過新婚免稅額，唔知佢會唔會向政府反映一下呢？
「可鼓勵後生成家」
結婚除咗要解決住屋問題，其他雜項開支都唔少。結咗婚將近一年嘅議員郭偉強就深有同感喇！佢話現時結婚擺酒嘅費用「十萬八萬都走唔甩」，而整個結婚過程花錢最多嘅地方就係擺酒，因為場地同食材嘅成本飆升。而佢結婚使咗幾多錢？郭偉強就唔肯透露，只係話依家結婚擺酒都好難有得賺，佢自己亦打唔到個和。不過佢都認同，新婚免稅額可以鼓勵年輕人成家立室。
至於早已「出櫃」嘅議員陳志全就認為，用新婚免稅額鼓勵人結婚嘅實際作用唔大，因為就算有免稅額，亦唔會好多，其次係結婚要考慮好多因素，其中一個就係特首梁振英成日講嘅「土地問題」，所以佢覺得政府要鼓勵人結婚嘅話，不如派獎金又或者送層樓先。不過假如政府真係採納免稅額建議，佢又會唔會提出司法覆核，要求免稅範圍擴展至同志婚姻呢？佢就話好難未立法就去諗提出司法覆核，但現時整個稅制都係向已婚人士傾斜，忽略性小眾，如果要司法覆核，佢就會針對整個現行稅制去做喎！