中環出更：星星賀歲捐「輸」 大吉利是！
農曆新年將至，又係時間幫屋企大掃除，掉咁啲自己冇用嘅物品。有團體尋日就搞咗個歲晚以物易物嘅環保活動，邀請咗環境局局長黃錦星（星星）擔任主禮嘉賓。星星出名環保兼慳家，大家估佢會帶咗啲乜嘢嚟同人交換呢？居然係八本有關環保建築同關注剩食書籍。臨近農曆新年送「輸」畀人，而且一送就八本，諧音「百輸」，真係大吉利是！再次證明我哋啲特區高官真係好離地，好唔貼近民情囉。
梁繼昌鍾國斌帶「兩梳蕉」
出席同一活動嘅仲有公專聯立法會議員梁繼昌（Kenneth）同自由黨立法會議員鍾國斌（Felix），卓妮見佢哋兩手空空，冇預備任何舊物件嚟交換，唔通係專登嚟「混吉」？Kenneth解釋，佢屋企有好多未用過嘅電燈膽想攞出來捐，但後尾發現原來係鎢絲燈膽，唔係好切合活動嘅綠色生活主題，所以都係唔捐喇。
Felix就仲夾硬嚟，話自己從事製衣業，可以捐出身上着緊嘅名牌服飾補數，但可能由於尋日天氣太凍，最後佢都係走咗數，冇當眾除衫同人交換。
活動仲包括參觀一個用作提升心理健康嘅園藝治療花園，分屬建制、泛民陣營嘅Felix同Kenneth，就趁機互寸對方先有需要接受心靈治療。Felix先係寸Kenneth要治療吓自己嘅歪念，唔好成日掛住拉布。Kenneth就反窒對方所屬嘅自由黨，立場一時一樣，黨員成日分開投票，「今日又話Ａ，聽日又話Ｂ」。但Felix就好自豪咁話，自由黨出名「自由」，佢哋每個人都有自己諗法，「等你估我哋唔到」喎。
至於星星局長亦唔執輸，借近期全球天氣反常，嚟比喻近年立法會運作因拉布影響而變得極端異常，笑言希望各方面都可盡快重回正路。
尋日仲有一段小插曲，話說Kenneth喺參觀園藝治療花園時，一聞就認到「迷迭香」最啱用嚟煎羊扒。如果佢嘅嗅覺真係咁靈敏，點解早前又會將立法會枱底嘅污漬聞錯咗做糞便呢？
卓妮