諸葛亮曾經給兒子寫過一封信，全文僅八十六個字，但言簡意賅，微言大義，讀來使人如沐春風，開頭幾句，老朽想送給創科局局長楊偉雄，事關佢以見過蘋果公司已故始創人Steve Jobs為榮，一再強調自己「真係見過」，巧威威，畀網民狂恥笑。
諸葛亮一開始就話畀個仔知：「夫君子之行，靜以修身，儉以養德；非澹泊無以明志，非寧靜無以致遠。夫學須靜也，才須學也；非學無以廣才，非志無以成學。」作為創科局局長，要帶領香港在科技上有所發明創新，需要的正正是心境平靜，只有讓靈魂安頓下來，才能夠讓自己的境界有所提高。
科學家做實驗，真有成就者，無不去到「忘我」境界，即使有成的學者、作家，亦都要專注，所謂「板櫈要坐十年冷，文章不寫一句空」是也，唔通見過金大俠、見過莫言、見過村上春樹、見過羅琳，自己就可以成為「偉大作家」耶？楊局長見過科技界「神人」喬布斯，興奮到好似啲女粉絲見到韓劇男神李敏鎬、蘇志燮、金秀賢咁，兩眼發晒光，聲線顫抖，以為自己在夢中！
有人說，楊局長亦如常人，對着科技界洋偶像，仰慕高山，真情流露而已！
行文至此，忽然想起一九六八年四月，美國《明星報》刊出了一篇有關在任總統詹森的社論，標題是《詹森承認失敗》，正文只有一個字：「妙！」老朽認為楊偉雄局長一再提高聲調話自己「真係見過Steve Jobs」，若然只用一個字形容，就係「癡」！癡人總愛說夢話，香港創科局在其帶領下，想「創新」想超越深圳——真係想創你個心！港產官僚唔係「癡」，就係「戇」與「廢」，香港呢個福地，係咁先！