政情：助青年發展 李文俊有新橋
百仁基金尋日舉行新一屆董事局就職禮，理文造紙創辦人李文俊（Raymond）第二次連任主席，全國政協常委余國春嘅兒子余偉傑就升呢做副主席。Raymond話，以往基金多數帶本港青少年參觀內地嘅大企業，但發現參觀大企業無助年輕人創業，來年打算改為帶佢哋參觀有成績嘅中小企，例如網上購物平台，畀後生仔吸取創業經驗。
Raymond又話，過往基金舉辦青年辯論比賽，認為呢類比賽可以訓練年輕人遇到問題時，作多角度思考，所以日後要多啲舉辦。希望基金可建立成為促進青年及成年人互信嘅平台。
尋日到賀嘅仲有百仁基金創會主席李家傑、曾任基金主席嘅全國青聯副主席施榮忻等人。靚女大狀容海恩（Eunice）亦與佢擔任主席嘅銀河管樂團一同演出，Eunice負責吹小號，真係多才多藝。