中環出更：怕暈吳得掂 潑學生冷水
長期外訪嘅教育局局長吳克儉（吳得掂）尋日難得喺科學園「着陸」，同港科院院長徐立之出席學生博覽會。期間兩人到一間中學嘅展覽攤位，有學生介紹自行研發分析腦電波數據嘅手機應用程式（APP）。現場有人要求吳得掂試戴，點知佢大笑話：「我暈咗點算？」徐立之聞言笑稱，若發現吳得掂「個腦死緊咁點算呢？」唔通徐立之擔心個APP會洩露吳得掂嘅病歷私隱？
話說個APP只要配合帽同耳夾偵測器，即可分析用家暈眩、興奮及癲癇等七大精神狀態，減低長期病患者同長者喺戶外發生意外嘅機會。呢個創新意念先被吳得掂拒絕試用，其後又被徐立之挫學生銳氣，因為佢發現向佢哋簡介嘅學生腦電波冇出現「緊張」信號，揶揄學生唔緊張即係部機唔掂喎！
兩人對中學生咁「絕情」，但對港大學生嘅虛擬現實模擬盒子就表現得好有興趣，吳得掂仲即場試睇盒子內嘅「櫻花」。唔通學生知佢掛住東京，專誠畀佢虛擬賞櫻？
參觀展覽都要睇櫻花
對於港大部分學生今日會商討將罷課行動升級，吳得掂認為同學真係要諗一諗，事關天氣真係涼咗好多，自己身體健康亦都重要，希望學生唔好因為罷課受影響。唔知學生聽到吳得掂嘅「溫馨提示」，會唔會感到好窩心而讓步呢？
徐立之分享學習經驗時就自爆，自細記性唔好兼容易分心，所以中學時中文背默經常唔合格，但就唔影響佢後來嘅發展，所以佢仲寄語大家唔好死背書喎！
卓妮