二○○三年因「買車事件」而離開政府嘅梁錦松，最近因提議「普教中」而再次成為被喝倒采嘅焦點。
阿松既然有心為教育出一番力量，好應該做吓功課，佢提議「普教中」，其中一個原因已是爛掉牙的老問題，所謂用普教中可提高中文寫作云云，根本係外行人嘅廢噏，老朽固亦一早為文指出其謬誤，而更多專家、學者亦力證其戇居。
另一個原因更係唔經大腦，佢話「普教中」其中一個原因是「唔係個個人母語都係廣東話」。阿哥，行走江湖好心唔好「隨口噏當秘笈」啦，據一一年人口普查數據顯示，香港有九成人口慣用語言係廣東話，僅約百分之一點四嘅人慣用普通話，阿松所言根本係堅離地！阿松之言，無疑是光腚打燈籠──淨照自己醜！本來佢咁有心為香港教育事務作推手，老朽就算唔請佢食老味都好應該請佢食一串「魚丸子」！
阿松九七年擔任教統會主席，香港回歸後佢幫政府推行母語教學，其時佢認為母語有助學生認識教學內容，如今又忽然要推「普教中」，此亦以「今日之我打倒昨日之我」耶？抑或以為「普教中」係政治正確？
其實，粵語不能廢，古粵語有超過二千年歷史，這是文化遺產啊！再說，在發音基礎上，掌握了粵語九聲的發音，更可學懂分辨古詩文的平仄基礎，這裏面的學問多着，老朽不學無術，不敢多講，之不過，粵語入詩，非普通話所能代替，好似梁羽生便介紹過廣東話嘅「垓下弔古」，阿松不妨一讀，便知其論之謬矣：又高又大又峨嵯，臨死唔知仲唱歌。三尺多長犀利劍，八千靚溜後生哥。縱使夾罅爭皇帝，何必頻淪殺老婆。若果烏江唔鋸頸，漢兵追到屎難屙。（峨嵯是廣東話「高大衰」、「靚溜」形容後生靚仔），廣東話之過癮，普通話難得其神韻也。