政情：奧運火炬傳遞 陳甘美華難忘
民政事務總署前署長陳甘美華（陳太）目前退休前休假，佢足足在政府工作了三十八年，日前接受部門通訊《民采》訪問中提到，佢喺每個崗位都有難忘回憶。其中民政嘅職位就令佢感受最深，讓佢有切切實實踏遍十八區接觸市民嘅機會，當中印象最深刻嘅包括○八年奧運馬術比賽項目，安排市民觀看火炬傳遞。
回顧天災事故最揪心
陳太回顧在任最揪心嘅事，無疑係每次天災或事故，與悲傷徬徨嘅受災市民同家庭在一齊嘅時候，好似南亞海嘯、埃及車禍、觀塘煤氣爆炸、馬頭圍塌樓事件及南丫撞船事件等，至今仍歷歷在目。佢又記得，豬流感封閉酒店一役，需要協助嘅大多是外地旅客，要做嘅工作同平日不一樣，佢同一班同事個多星期幾乎以辦公室為家，工作至深夜，天未光又要返回辦公室。
至於最開心嘅，陳太認為係市民對佢哋工作嘅肯定和認同，每次見到市民送來嘅感謝卡，都是全賴部門上下及前線同事投入工作嘅出色表現。佢又話，自己係追求完美者，明知世上無完美，但以此策勵自己努力。