中環出更：大舊鬧爆張炳良「菠蘿雞」博上位
立法會工務小組委員會尋日續議高鐵工程超支嘅追加撥款申請，泛民主派議員繼續就無聊問題拉布。民主黨（白鴿黨）前黨員，現任人民力量議員陳偉業（大舊）就喺會上大鬧曾經都係白鴿黨成員嘅運輸及房屋局局長張炳良係「菠蘿雞」，批評佢一味靠佔人便宜上位，搞到張炳良全程黑面，非常無癮。社民連「長毛」梁國雄亦指工程界議員盧偉國個腦有問題，涉言語冒犯他人。
大舊一開口就已經藉銅鑼灣書店負責人失蹤事件，大鬧政府唔理市民生死，又話張炳良係「菠蘿雞局長」，經常推卸責任。喜好同大舊鬥嘴嘅鍾樹根，立即打斷大舊發言，要求大舊澄清咩係「菠蘿雞」。點知大舊藉解釋用詞又大鬧一番，話「菠蘿雞」即係「靠黐」，好似張炳良見白鴿黨有利益就做副主席，選不上副主席就退黨，做咗官就唔再表明平反六四。
高鐵追撥又冇結果
反轉議會嘅事接二連三上演，人民力量陳志全（慢必）開會不足一小時就提出休會辯論議案，主席盧偉國覺得議員仲有好多提問，建議慢必收回議案，點知就被長毛話佢個腦有問題。盧偉國裁定長毛咁講有冒犯，叫長毛收回，但長毛反稱盧偉國中文差，腦中有提出嘅問題即係代表有思考，係讚賞，仲話只有傻瓜先無問題喎。會議最後用咗兩個鐘，仍然得唔出結論，撥款申請又要留待下回分解喇。
卓妮