中環出更：把握「時」機 打造青年創業路
近年唔少大學生畢業後都希望嘗試創業路，早兩日創意創業會及香港青年創業家協會就合辦咗個晚宴，一班一手一腳創業嘅年輕人聚首交換創業心得，每位都緊貼市場趨勢不斷應變，好似創意創業會會長、時昌迷你倉創辦人時景恒（Kevin）咁，就知道近年好多新落成的本地住宅單位都好袖珍，揀喺附近開設迷你倉畀住客擺放唔常用嘅嘢就啱晒喇。
鄭康宏炮製「雪糕騷」
當日在場嘅創業人士好多都年紀輕輕，但個個都有一套獨門創業秘笈兼魄力十足，好似Lab Made分子雪糕專門店創辦人鄭康宏（Ronnie），就充分掌握香港人飲食心態，唔單止講求味道同賣相，仲好講究整個進食前後的體驗，所以佢哋近期就將雪糕生意做埋「到會」，帶晒啲工具出去婚宴同派對場地即叫即造，將炮製雪糕做到好似一個騷咁表演，加埋製作雪糕時飄出嘅氮氣，氣氛一流！
早兩年加入飲食行列的「舖王」鄧成波兒子鄧耀昇亦有在場，原來當日活動場地正是佢主場，新開張只有一個月左右，係觀塘工業區內難得一個早晚會「變身」的飲食場所。日頭以食街形式主打廠廈及辦公室午飯時段，附近返工嘅人可以用手機App提早落單，分秒必爭；晚上可化身婚宴、派對場地兼酒吧。
不過，亦有好多人創業初期會觸礁，香港青年創業家協會會長謝棓就係幾經波折 先搵到最適合自己嘅創業路，由車會轉做着數網再轉型做印刷卻未曾氣餒，勉勵年輕人唔好怕失敗，終有日會成功。
卓妮