民協立法會議員馮檢基（阿基）喺區議會選舉中落敗，令佢無法再循俗稱「超級區議會」嘅區議會第二功能界別參選，惟有另謀出路，早前有傳阿基有意落戶九龍東或新界西，及力保超級議席及九龍西老巢，但政治一日都嫌長，最新消息指，本身循新界西直選當選嘅街工立法會議員梁耀忠（阿忠），忽然有意轉戰超級議席，似乎係衝住阿基所屬嘅民協而來，莫非潛台詞係希望阿基打消落戶新界西嘅念頭？
阿忠接受查詢時無直接回應此舉係咪同阿基嘅動向有關，只稱擔心阿基及民主黨何俊仁同時失去超級議席入場券，日後大部分超級議席會落入建制手中。佢又稱，自己一旦出選超級議席，本身於新界西嘅票源可以留番畀其他泛民，但佢其後疑留有餘地，稱街工本身亦可考慮派人填補佢喺新西嘅空缺。
另一事件主角阿基則透露，阿忠有搵過佢傾轉戰超級議席一事，但強調民協派出四隊，包括超級議席嘅諗法無變，又認為如果泛民目標係保住廿四席，無理由只討論超級議席，而唔傾地區直選布陣。