政情：去殖化 外籍AO將成歷史
香港政府於八十年代末已停止招聘外籍人士任政務主任（AO），而香港九七回歸後，隨着近年一批外籍AO退休或離開政府，外籍AO數目愈來愈少，猶如進行政務官「去殖化」嘅過程，適逢最近主責康體政策嘅民政事務局副秘書長麥敬年退休，據知現屆政府只餘下兩名外籍AO，分別係香港駐紐約經貿辦處長柏嘉禮及效率促進組專員蘇啟龍，呢兩名末代外籍AO離開添馬艦門常開時，將見證AO團隊完全本地化嘅歷史時刻！
退休麥敬年 踢波學粗口
還記得二○一二年底，有傳媒曾統計政府當時有六名外籍AO，事隔三年多後，連同曾任民政局副秘書長長達七年嘅麥敬年退休，目前只餘兩名外籍AO，我哋早前同麥敬年傾過，佢透露自己大學時修讀法文及俄文，對以前學習中文頗有裨益，加上踢波時同港人波友溝通時學懂中文，其時踢波術語學到少少，粗口亦都學到唔少。
除了學懂中文同港人打成一片，麥敬年又自爆於一九九三年喺酒吧邂逅太太嘅情景︰「當時有兩名華人同事與我一樣，喜愛到酒吧飲酒談天，當晚佢哋見到兩個靚女想認識，就由我主動上前帶他們認識，點知其中一人就係我依家嘅太太」；至於該兩名華人同事嘅身份，麥敬年就無透露嘞！
在職柏嘉禮 獲「麗音待遇」
相比起麥敬年學識講廣東話，柏嘉禮走入官場之初，擔任北區助理政務專員時曾遇上語言不通嘅情況。佢憶述，自己其時嘅翻譯同內地官員雖然都識廣東話，但兩地用語不同，就算寫下指示，都因繁簡體字不同有差別，佢笑言唯一識講嘅廣東話係，「我啲廣東話唔係幾好」，然而佢有時都會遇到政府同事嘅「特別待遇」，就係當佢進入會議室，大家就會轉講英文，一旦佢離開會議室時，佢哋先會轉回用廣東話。
講到政府面對嘅挑戰，柏嘉禮形容港人要求高，目前如交通、教育於世界來說已屬頂級，但港人仍然唔滿足，對政府而言屬於巨大挑戰。對於最近版權修訂條例草案爭議，身為過來人曾於八十年代負責將知識產權法例現代化嘅柏嘉禮認為，「保護版權係要平衡三方，即創作者、競爭者及顧客，如有一方特別高興，就代表你不夠平衡」，唔知對於主責版權法嘅商務及經濟發展局，繼續推銷版權法時有冇多少啟示呢？