中環出更：拒撐TSA 建制團體摑吳得掂一巴
教育局局長吳克儉（吳得掂）於小三全港性系統評估（TSA）爭議被泛民主派、教育界、家長等窮追猛打，最新連建制專業團體都冇面畀，以提出新年度施政報告建議為名，要求政府暫緩TSA至少一年，又批評目前TSA係擺錯重點，令整件事本末倒置，最終根本幫唔到班學生，變相再摑吳得掂多一巴。
促暫緩最少一年
由全國青聯常委吳傑莊任召集人嘅青年專業聯盟（聯盟），趁新年度施政報告公布前夕提出廿四項建議，其中聯盟教育界會長、理大專業及持續教育學院資訊科技總監陳繼宇提及TSA爭議，希望政府暫緩TSA至少一年，包括把小六TSA同中三TSA均一併暫緩，又提議教育局成立促進學習評估中心，以跟進評估學校整體運作。
陳繼宇又稱，一批校長老師普遍都歡迎佢提出嘅理念，又自言好多老師均唔鍾意學校排名一事，認為完全唔排名就最好喎。
話時話，除了教協等團體一直要求暫停TSA，依家連有建制派背景嘅專業團體都加入戰團，要求教育局暫停TSA，吳得掂被左右夾擊睇怕有排煩喇。
卓妮