立法會上周審議《版權條訂條例》時第二度流會，事後泛民揚言會繼續拉布同點人數，隨時影響來年度財政預算案嘅審議工作。商務及經濟發展局局長蘇錦樑今日又喺多份報章撰文唱好版權法，但今次嘅用詞就比過往強硬同激情得多，包括用「核子彈」嚟比喻拉布同流會、以「溫水煮蛙」嚟形容香港競爭力下跌，又狠批少數人將全港七百萬人「綁上戰車」，遲早會「玉石俱焚」同奏出「悲壯的謳歌」等。咁又係嘅，如果版權法再度難產收場，第一個被核彈炸死同畀戰車輾斃嘅就係蘇錦樑，佢激動啲都係正常嘅。
