政情：Miss唔夠索 盛男難譜師生戀
師生戀再一次成為全城熱話，勾起唔少人兒時嘅回憶。香港軟件行業協會會長楊全盛（Eric）尋日出席一項活動時自爆，自己讀書嗰陣，阿Sir（男教師）就樣衰，Miss（女教師）又唔靚，啲同學因此唔會鍾意佢哋，反而自己同學之間就「搞嚟搞去」，因此冇親身經歷或見證過師生戀。
女神變阿嫂 乜幻想都冇
Eric又透露，佢讀書啲男同學大多數封周慧敏係女神，佢自己就鍾情黎瑞恩，但呢位女神已喺佢心中幻滅。點解呢？皆因黎瑞恩後來嫁咗畀現任中總副會長曾智明，而曾智明係佢嘅好朋友，女神做咗佢阿嫂，自然乜幻想都冇晒喇！