政情：「第一」女總警司 「林」別細數威水史
警察向來係由男性主導，女性要喺群雄中脫穎而出並不容易，即將榮休嘅女總警司林曼茜，加入警隊逾三十年來，就用行動嚟證明自己「巾幗不讓鬚眉」，並留下多項「第一」紀錄，部分紀錄至今無人能夠打破。
難忘與丹麥皇室用膳
林曼茜九二年曾破獲一單總值一億六千五百萬港元嘅跨國毒品案件，金額之高至今無人能及。佢亦係香港警隊第一批女CID、第一個女港督榮譽副官、第一個機動部隊女大隊長同女教官。講到三十年來嘅威水事迹，林曼茜話最難忘係當年代表港督與丹麥皇室用膳、以及警方為佢打破年過四十就要離開機動部隊嘅規矩。
林曼茜除咗做過機動部隊，亦曾任灣仔警區指揮官，處理過多項大型遊行示威。佢認為做上級最緊要以身作則，當年每次七‧一，佢都會由朝早升旗禮做到晚上遊行結束，由灣仔行到西環，收工時「攰到連上車嘅力都冇」。談及近年嘅警民衝突，示威者成日用粗口辱罵警員，林曼茜認為要畀足夠機會示威者表達意見，但若果對方妨礙警員執法，就要採取果斷行動，佢個人亦支持訂立辱警罪保護前線警員。