政情：反中亂港 肥佬黎驚被失蹤
銅鑼灣書店五名股東及員工接連離奇失蹤事件，有傳媒披露其中一名失蹤港人李波嘅最新視頻同自白書，重申返回內地屬個人行為，呼籲大家唔好再大作文章。言猶在耳，支聯會尋日堅持辦遊行，壹傳媒集團前主席黎智英（肥佬黎）旗下刊物，更大字標題稱李波事件「唔出聲遲早到你」，擺明想為遊行谷人數。肥佬黎咁做，除咗為嚟緊嘅立法會新東補選製造選舉議題，另一原因可能係肥佬黎本人，正正係喺香港出版反中亂港刊物嘅始祖。如果喺香港出版有關刊物係犯法同有機會被擄走，下一個目標可能就輪到佢，佢唔驚就有假！
肥佬黎喺上世紀九十年代開始，就喺香港創辦壹傳媒出版反中亂港刊物，唱衰中港兼荼毒市民，但由於有關行為係喺香港發生，肥佬黎本人連回鄉證都冇，自然唔會主動返內地，內地當局因此一直冇佢符。
「搞事四人幫」 頻興風作浪
近年肥佬黎愈玩愈過火，包括透過「政治獻金」操控泛民政團搞搞震，又聯同「李漢奸」民主黨創黨主席李柱銘、「民主阿婆」前政務司司長陳方安生同「反叛主教」天主教香港教區前主教陳日君，組成「搞事四人幫」喺香港興風作浪。到前年佢更出錢又出力，策動歷時七十九日嘅違法佔領行動，最終搞到天怒人怨，普選特首目標成空，但香港警方同律政司遲遲唔做嘢，肥佬黎等佔領搞手至今仍然逍遙法外。
不過，若然李波真係由內地執法部門派員來港擄走，作為出版反中亂港刊物始祖嘅肥佬黎就真係有排驚。佢一方面大力呼籲市民參加尋日嘅遊行，但自己就冇身體力行參與，唔通係驚遊遊吓行會畀人用「自己的方式」帶返內地？
快閃失敗 「民主阿婆」（火羅）爆
講開搞事四人幫，李漢奸同陳方安生尋日都有參與遊行，但後者又係中途快閃，行到去中環一帶，就想喺干諾道中截的士離開。但需知周日中區一向好難截車，再加上遊行封路，陳太自然再次敗走，要折返德輔道中改搭電車離開，真係（火羅）爆！