激進泛民主派透過不停響鐘點算開會法定人數，令前日立法會大會因法定人數不足而流會，未能如期審議《2014年版權（修訂）條例草案》，搞到主席曾鈺成都嬲嬲哋，表明不能接受。不過，卓妮發現曾鈺成同促成流會嘅其中一個「罪魁禍首」、社民連梁國雄（長毛）原來去年底雙雙遠赴波蘭共度聖誕，朝夕相對足足六日。不過，長毛並未因今次旅程放軟「拉布」態度，似乎一心拖死草案。
曾鈺成同長毛經常在立法會針鋒相對，長毛更多次因行為不檢，被曾主席逐出會議廳。卓妮翻查立法會議員個人利益登記冊，發現曾主席同長毛分別申報於去年十二月廿二至廿八日，接受義工組織及本地電視台嘅贊助和邀請，到波蘭華沙、霧芝和格旦斯克，了解當地義工工作，行程包括探訪當地貧窮家庭，為獨居及流浪者籌備平安夜聚餐，又與當地研究香港文化的研究生會面，討論香港教育及身份認同問題，六日行程嘅機票食宿均獲贊助。
事實上，雖然曾鈺成與長毛在鏡頭下經常隔空對陣，但據知二人私底下惺惺相惜、互相欣賞對方才華，關係不錯。
卓妮