中環出更：百鳥朝凰 齊助病童
新一年開始，仁愛堂打頭陣舉行周年慈善餐舞會，晚會主題為「百鳥朝凰‧孔雀開屏」，所以不少名媛都花枝招展示人，仁愛堂主席史顏景蓮（Kimmy）就頭戴孔雀飾物，與當晚主題襯到絕，又全晚游走會場招呼賓客，咁落力，目的為一班患病兒童籌款。
Kimmy話，仁愛堂為咗特殊兒童醫療及藥物需要，成立咗「仁愛堂兒童醫療基金」，資助患上專注力失調及過度活躍症嘅六至八歲兒童早日作專業評估，預計首年受惠有六百人。佢哋仲會推出「中醫音樂治療先導計劃」，為腦退化症患者提供非藥物治療。
曹貴子新App搞籌款
一次過要搞咁多項目，真係無財不行。Kimmy話，雖然市道麻麻，但善長一向支持開佢哋，相信影響不大。
仁愛堂副主席曹貴子就諗到條好橋，話說佢近期搞咗個手機應用程式（App），提供平台畀善團，將佢哋想推行嘅項目放上平台籌款，邊個善長有興趣就可以撳入去捐錢，就算唔捐錢，亦可以選擇留言支持，至今反應唔錯。
同場仲有仁愛堂總理沈運龍、李慧芬、蔡少森及禤國全，其中做開珠寶生意嘅沈運龍同李慧芬密密斟，原來係講起李慧芬「識貨」，買咗沈運龍珠寶店內有專利權嘅鑽石手鏈同埋戒指，所以沈運龍遠睇就已經認得李慧芬戴緊自己公司嘅珠寶喇。
講起近期日圓下跌，遊日抵玩，搞開日本旅遊嘅東瀛遊旅行社執行董事禤國全就話佢一年到晚都係返工，好少放假，但都會爭取每年一家廿八人去次旅行，今年就揀定坐郵輪，貪佢動靜皆宜，老人同小朋友都啱喎。
卓妮